FILE PHOTO : (L-R) Sen. Chiz Escudero, Sen. Ferdinand Marcos Jr. (UNTV News)

MANILA, Philippines — Pinabulaanan ng ilang senador ang nakasaad sa supplemental affidavit ni Janeth Lim-Napoles na nagkaroon sila ng transaksyon sa tinaguriang utak ng pork barrel scam.

Ayon kay Senador Ferdinand Marcos Jr., hindi niya kailanman nakatransaksyon si Napoles.

Wala rin aniyang katotohanan na ang dati nitong empleyado na si Catherine Mae Canlas-Santos ang naging ahente niya kay Napoles.

Si Santos aniya ay naitalaga sa kanyang opisina noong Enero 2011 hanggang Hunyo 2013.

Marso 21, 2013 naman ay na-terminate na ito sa opisina ng senador dahil sa bigong pagsusumite ng year end report, apat na buwan bago ang pagsasapubliko ng PDAF scam.

“The affidavit speaks for itself, I have never met Mrs. Napoles I have never any dealing with her and anything have to do with this schemes,” pahayag ni Senador Marcos.

Naglabas din ng pahayag si Senador Loren Legarda na kasama rin sa affidavit ni Napoles.

Ayon sa senadora, wala siyang naging transaksyon kay Napoles o kahit sa anumang grupo nito.

Hindi rin umano siya tumanggap ng anumang monetary o anumang illegal benefit sa kanyang PDAF.

Pinabulaanan din ni Legarda na nag-endorso ito ng mga NGO na pag-aari ni Napoles at sinabing malinaw na smear campaign ang affidavit ni Napoles.

Pinasinungalingan din ni Senador Chiz Escudero ang akusasyon ni Napoles.

“Hindi totoo. Dineny ko na yan ng una pa to begin with sabi niya 2010 daw yun, eh 2010 nangangampanya na ako para sa Noy-Bi. Ni hindi ako kandidato at year months before 2009 dineny ko na tatakbo ako sa eleksyon ng 2010,” pahayag ng senador.

Tumanggap din umano ng campaign funds mula kay Napoles sina Senador Alan Peter Cayetano, at dating senador Manny Villar base sa affidavit.

“I didn’t meet her in slice. I don’t know her eh, baka nakita niya ako don or she ate there I didn’t meet her to get money,” mariing pahayag ni Senador Alan Peter Cayetano.

Nakasaad naman sa affidavit page 20 ni Napoles na humingi ng tulong sa kanya ang kampo ni Villar para sa campaign funds at nagkita sila sa Shaw Boulevard sa Mandaluyong City.

Pinasinungalingan naman Senador Cynthia Villar ang akusasyon ni Napoles laban sa kanilang mag-asawa.

“Do you think naman kailangan yun ni Senator Villar,” pahayag ng senadora.

“Di ko naman sinasabing ganun, pinaghirapan namin ang aming mga kinita, wala namang barya sa amin, lahat pinaghirapan.”

Nakasama rin sa supplemental affidavit sina Senador Lito Lapid, Sen. Koko Pimentel, Sen. Vicente Sotto III at Sen. Gringo Honasan.

“We will file perjury as well as some libel cases, against Napoles and other people responsible for damage to my reputation. Baka may media kasama,” pahayag ni Sen. Koko Pimentel.

Bukod ang mga nabanggit na senador kina Senador Juan Ponce Enrile, Sen. Jinggoy Estrada at Sen. Bong Revilla Jr. na nauna na ring nailabas sa affidavit ni Napoles.

Pinabulaanan din ni Estrada ang akusasyon laban sa kanyang ina na si dating Senador Loi Ejercito. (Bryan De Paz / Ruth Navales, UNTV News)