Ang pagharap ng National Commission for Culture and the Arts o NCCA sa media (UNTV News)

 QUEZON CITY, Philippines — Humarap na sa mga mamamahayag ang National Commission for Culture and the Arts (NCCA) upang ipaliwanag ang kabiguan nitong maideklarang national artist ang namayapang hari ng komedya na si Dolphy.

Ayon kay Atty. Trixie Angeles, legal counsel ng komisyon, may dinadaanang proseso ang pagdi-deklara sa isang national artist. Hindi lang aniya mga sikat na artista ang pinagbabatayan upang hiranging national artist.

“Wala kaming batikos kay Mang Dolphy, ang ipinapakiusap lang namin sa publiko ay kaunting pasensiya kasi dumadaan sa proseso.”

Dagdag ng abogado, may mga manunulat sa panitikan ng Visayas na nominado rin sa pagiging national artist kahit hindi sikat sa buong bansa. Maging ang dating action star at presidential candidate na si Fernando Poe Junior ay naideklarang national artist hindi dahil sa sikat itong artista sa pelikula.

“Si FPJ idineklara siya for cinematic arts, ibig sabihin hindi lang bilang artista, bilang producer, director, script writer, at film archivist, kasi si FPJ hindi lang niya pinalabas ang mga sine niya, itinago niya nang maaayos.”

Paliwanag pa ni Angeles, limitado ang kapangyarihan ng presidente ng bansa sa pagdi-deklara ng isang national artist. Ang magagawa lang aniya ng Pangulo ay aprubahan o tanggihan ang rekomendasyon ng NCCA.

Ayon pa kay Angeles, ang pagkaka-deklara ni dating pangulo Gloria Arroyo sa apat na national artist noong 2009 ay tinutulan ng komisyon dahil hindi ito dumaan sa tamang proseso.

Sa kaso naman ng namayapang hari ng komedya, may pag-asa pa itong maideklarang national artist ngunit aaabutin pa ng dalawang taon ang proseso ng komisyon. (Ito ang Balita ni Grace Casin/Ruth Navales, UNTV News)

Si Pangulong Benigno S. Aquino III kasama ang pamilya at mga mahal sa buhay ni Comedy King Rodolfo “Dolphy” Vera Quizon, Sr., sa Heritage Memorial Park, Fort Bonifacio, Taguig City noong Thursday (July 12) (Photo by: Benhur Arcayan/ Malacañang Photo Bureau).

MANILA, Philippines — Ikinatuwa ng Pamilya Quizon ginawang deklarasyon ni Pangulong Benigno Aquino III ang ika-13 ng Hulyo bilang National Day of Remembrance para kay Dolphy.

Ayon kay Ronnie Quizon, isa sa mga anak ni Mang Dolphy, siya ang unang kinausap ng Malakanyang sa pamamagitan ng telepono upang konsultahin sa paglalaan ng araw sa pagpanaw ng kanyang ama.

“National Day of Mourning, correct. Tapos sabi ko, siempre magugustuhan ng anything na ini-o-offer sa family namin. Kaya lang sabi ko, I know my Dad. I don’t think he want the nation to mourn, so medyo ayaw namin ‘yung “mourning.” Kaya suggest nila kung National Day of Remembrance. Sabi ko sige ok sa amin,” pahayag ni Ronnie.

Malaking kagalakan din sa pamilya nang personal na dumalaw at makiramay sa kanila ang Pangulo.

“Sa ganung mga bagay maski papaano nababawasan ‘yung aming lungkot sa buhay. Binigyan niya ng importante ang araw na ito (Hulyo 13) para ipakita sa ating mga kababayan na ang ama ko ay malaking kawalan sa ating movie industry, so maraming salamat,” pahayag ni Manny Boy Quizon.

Ikinatuwa rin ng pamilya ang panukala sa Kamara na ideklara naman ang Hulyo 10 ng bawat taon bilang “Dolphy Day” o “Filipino Fun Day.”

“Masarap! Biruin mo sa taong ito hindi sya makakalimutan. Kung baga nakatatak na sa buong Pilipinas,” pahayag naman ni Rowell Quizon.

Samantala, tiwala naman si Miss Susan Roces, ang maybahay ng namayapang si Fernando Poe Jr. na makukuha ni Dolphy ang parangal bilang National Artist kagaya ng kanyang yumaong asawa na si Fernando Poe Jr.

“Malaki ang paniniwala ko na igagawad iyon sa kanya. He really deserves it. Salamat sa pagiging napakabuti mong kaibigan. Salamat sa pagiging matulungin mo nang hindi mo ipinangangalandakan. Quiet lang. Maraming salamat, Dolphy. I love you,” pahayag ng kaibigan ni Dolphy.

Ngunit para kay Ronnie, mas maganda nga sana kung naipagkaloob ang pagkilala sa kanilang ama noong ito ay nabubuhay pa.

“Especially during the last few moments, why would we think of awards. Pero knowing na ibinibigay syempre maganda ‘yun. Sayang lang, di ba? Sana buhay ang tatay ko kasi at least, ‘ yung appreciation niya masasabi niya sa inyo,” pagtatapos ni Ronnie Quizon. (Ito Ang Balita ni Bert Cerrudo / Marje Navarro, UNTV News)

FILE PHOTO: Larawan ni Comedy King Rodolfo ‘Dolphy’ Quizon (PHOTOVILLE International / Roan Ruanto)

MANILA, Philippines – Nagpalabas ng Proclamation No. 433 si Pangulong Noynoy Aquino III na naglalaman ng deklarasyon nitong gawing National Day of Remembrance ang Hulyo 13. Ito ay bilang paggunita sa yumaong aktor at komedyante na si Rodolfo “Dolphy” Quizon Sr.

Ayon sa Pangulo, mananatili ang alaala ni Dolphy sa kasaysayan ng Kulturang Pilipino at sa puso sa bawat mamamayan nito. Nakasaad rin sa proklamasyon na ang bawat kontribusyon ni Dolphy sa ilang dekada nitong pagiging artista ay nagpataas sa kalidad ng industriya ng pinilakang tabing at nagpatibay sa pagkakakilanlan ng kultura ng ating bansa.

Ayon kay Deputy Spokesperson Abigail Valte, ang naturang pagkilala ay alinsunod sa kahilingan ng yumao sa Pangulo na nais nitong maalala na larawan ng kasiyahan at pagmamahal na ipinakita niya sa mga tao.

Gayunman, nilinaw ng Palasyo na may pasok at hindi non-working holiday ang araw na ito. (UNTV News)