Ombudsman, Ipinag-utos na Arestuhin na si CGMA sa Kasong Plunder

FILE IMAGE: Ang pansamantalang paglaya ni dating pangulong Gloria Macapagal Arroyo noon July 25, 2012 pagkatapos makapagpiyansa ng P1,000,000. (UNTV News)

MANILA, Philippines – Ipinaaaresto na ng mga Ombudsman prosecutor si Pampanga Congresswoman Gloria Arroyo batay sa isinagawang pagdinig ng Sandiganbayan sa kasong plunder na nakasampa laban sa kongresista.

“The incident pertains to our motion is for the immediate issuance of a warrant of arrest. The court should have already issued a warrant of arrest just what court did in the plunder case of Estrada, where immediately after filing the information, they immediately issued a warrant of arrest,” pahayag ni Atty. Diosdado Calonge, abogado ng prosekusyon.

Ayon kay Calonge, nararapat lamang na ipaaresto na ng korte si Arroyo kahit may ipinalabas nang hold departure order ang Sandiganbayan. Ito ay dahil walang katiyakang mananatili sa bansa ang akusado na anumang oras ay maaari itong humingi ng permiso sa korte.

“If we go by the practice of the court, the warrant of arrest should have been issued simultaneously with the HDO because when the court issues a HDO, it is presumed that they have already evaluated that there appears a probable cause to proceed with the trial,” dagdag pa ng abogado.

Tinutulan naman ito ng abugado ni Gng. Arroyo.

Ayon kay Atty. Christian Diaz, hindi maaaring maglabas ng warrant of arrest ang korte dahil hindi pa natatapos ng Ombudsman ang preliminary investigation nito.

“Resolution of the Ombudsman is not yet final and executory. Therefore, the accused, all of us, are still entitled to file a motion for reconsideration, ” pagtatanggol ng abogado ni Arroyo.

Giit naman ng prosekusyon, pinatatagal lamang ng depensa ang kaso.

“Dilatory tactics ito,” pahayag ni Atty. Linda Capunan, isang private prosecutor.

“Di n’yo po pwedeng sabihing delaying tactics ito because we are simply exercising our rights. If you’re exercising your rights, you cannot be accused of delaying the proceedings,” paliwanag naman ni Diaz.

Sinabayan naman ng kilos protesta ang pagdinig ng Sandiganbayan. Nagkaharap ang mga pro at anti-GMA at muntik pang magkainitan. Nakatulong naman ang presensya ng mga otoridad upang humupa ang tension.

Matatandaang ang plunder case laban kay Arroyo ay dahil umano sa di maipaliwanag na paggamit ng Arroyo Administration sa P360M pesos na pondo ng Philippine Charity Sweepstakes Office. (Ito Ang Balita ni Grace Casin/Marje Navarro, UNTV News)