GRAPHICS: Mga possibleng tumakbo sa pagka-House Speaker sa 16th Congress (UNTV News)

MANILA, Philippines – Apat na mambabatas ang posibleng mag-agawan sa house speakership pagpasok ng 16th Congress sa Hulyo.

Ito ay sina Leyte Rep. at Lakas-CMD Chairman Martin Romualdez, UNA campaign manager at Navotas Rep. Toby Tiangco, former minority leader at San Juan Rep. Ronaldo Zamora at House Speaker Sonny Belmonte Jr.

Sa mga nabanggit na pangalan, si House Speaker Feliciano Belmonte umano ang may malaking tyansa dahil sa kaalyado ito ng administrasyon.

Ayon naman kay House Minority Leader Danilo Suarez, nais nilang muling makuha ang minority seat at ang kanilang kandidato rito ay si Romualdez.

Simula sa susunod na linggo ay pupulungin na ng minority ng kamara ang mga bagong halal na district at party-list representative.

“We will try to ask them if they are interested to help Martin for the leadership of the house,” pahayag ni Cong. Suarez.

Samantala, maugong din ang balita na interesado rin umano si UNA campaign manager at Navotas Rep.Toby Tianco sa minority seat.

Gayunpaman, ayaw raw muna itong kumpirmahin ni Tianco dahil tatalakayin pa umano ito ng koalisyon.

Sinabi ni Tianco na hindi sila maituturing na oposisyon dahil handa silang suportahan ang mga programa ng pangulo lalo’t ito ay para sa taumbayan.

“I have to listen to the sentiments of our partymates sa UNA, kailangan kong madinig ang sentimiyento nila kasi it’s not the decision I can do on my own,” paliwanag ni Tianco.

Lumulutang rin ang pangalan ni San Juan Rep. Ronaldo Zamora na dati nang naging minority leader, subalit wala pa rin umanong pormal na pahayag ang mambabatas ukol dito.

Sa initial count, mayroong mahigit 100 kongresista sa kamara ang nasa Liberal Party; 14 mula sa Lakas-CMD, 20 sa Nationalist Peoples Coalition (NPC) at 8 mula sa UNA. (Grace Casin & Ruth Navales, UNTV News)

FILE PHOTO: “Alam naman nya (President Noynoy Aquino) yung aking strengths, alam nya kung paano ako magtrabaho, I think I’ll be an asset more than a liability to him.” — Team PNoy Spokesperson Congressman Lorenzo ‘Erin’ Tañada III (RAYMOND BALA LACSA / Photoville International)

MANILA, Philippines – Hindi magdadalawang isip si House Deputy Speaker at Quezon Province 4th District Rep. Erin Tañada sakaling alukin siya ng posisyon sa gobyerno ni Pangulong Aquino.

Sinabi rin ni Tañada na wala siya sa posisyon para mamili kung saang pwesto niya gusto.

“I just leave it to the discretion of the President, alam naman po niya na tapat akong maglingkod sa bayan.”

Idinagdag pa ni Tañada na hindi nya sisirain ang tiwalang ibibigay sa kanya ng Pangulo.

“Alam naman nya yung aking strengths, alam nya kung paano ako magtrabaho, I think I’ll be an asset more than a liability to him,” pahayag pa ng mambabatas. (Lea Ylagan & Ruth Navales, UNTV News)

FILE PHOTO: Si Senator Grace Poe-Llamanzares kasama ang Pangulong Aquino at ang Team PNOY sa isang campaign rally sa Cebu. (JAMES VERCIDE / Photoville International)

MANILA, Philippines – Ipinahayag ni House Deputy Speaker Rep. Erin Tañada na ikatutuwa ng Liberal Party (LP) kung sasama sa kanila ang number 1 sa mga nanalong senador sa nakaraang halalan na si Grace Poe-Llamanzares.

“Kilala naman nya yung mga personalidad sa likod ng Liberal Party at open invitation naman kay Sen. Grace na sumama sa Liberal Party. Nasa kanya po yan, we will be very happy if she will decide to join the Liberal Party.”

Sinabi rin ni Tañada na bagama’t ipinapalagay ng marami na mananalo si Poe, hindi naman inasahan na mangunguna ito sa mga nagwaging senador.

Aniya, tiyak na interesado na ang ibat-ibang partido na makasama si Poe para sa 2016 elections.

“Nayanig ng konti ang itsura ng 2016 dahil being number one it means that there is a posibility na pwede kang maging vice-presidential candidate…”

“Ngayon yung mga nag-iisip na tumakbo sa mas mataas na posisyon ay kinakabahan na o gustong ligawan,” pahayag pa ni Tañada.

Gayunman, sinabi rin ng mambabatas na masyado pang maaga para pag-usapan ang presidential elections sa 2016. (Lea Ylagan & Ruth Navales, UNTV News)

Kingdom of Saudi Arabia and Philippines Flag (Wikipedia)

MANILA, Philippines – Pinagtibay na ng Pilipinas at Saudi Arabia ang Standard Employment Contract na may layuning mapangalagaan ang kapakanan ng Filipino household service workers.

Itinuturing na makasaysayan ang paglagda ng Pilipinas at Saudi Arabia dahil ito ang unang pagkakataon na nakipagkasundo ang Saudi sa isang labor sending country.

Nakapaloob sa kasunduan ang proteksyon ng gobyerno sa Filipino household workers at minimum na sahod na mahigit sa labing-anim na libong piso.

Bibigyan din ng oras ng pahinga sa isang araw ang mga OFW at day-off sa isang linggo at paid vacation leave.

Bawal na ring i-hold ng mga amo ang kanilang passport at working permits.

Pinagtibay din dito ang pagkakaroon ng maayos na pag-trato sa mga household service worker.

Tinatayang nasa anim na raan at pitumpung libong OFW ang nasa Saudi Arabia sa ngayon at 60-libo sa mga ito ay nasa household service.

Sa kasunduang ito, umaasa ang Department of Labor and Employment (DOLE) na mababawasan na ang kaso ng pang-aabuso sa mga household service worker sa Saudi Arabia. (Ley Ann Lugod & Ruth Navales, UNTV News)

Ang welding ang isa sa mga pwedeng i-enroll ng mga kababayang OFW sa TESDA. (UNTV News)

MANILA, Philippines – Handa ang Technical Education and Skills Development Authority (TESDA) na tulungan ang mga Filipino worker na uuwi sa Pilipinas dahil sa naranasang problema sa pinagtatrabahuhang bansa.

Sa umpisa pa lamang ng taong 2013 ay sunod-sunod na problema na ang nararanasan ng mga OFW sa Malaysia, Saudi Arabia, at ang pinakabago ay sa Taiwan.

Ayon kay TESDA Director General Secretary Joel Villanueva, iba’t ibang kurso ang naghihintay sa mga OFW na nagnanais na madagdagan ang kaalaman sa paghahanap-buhay.

Kabilang dito ang technical course sa turismo, business process outsourcing at maging sa industriya ng construction.

“We wanted to retrain them retool them para nang sa ganon pag gusto nilang bumalik uli o gusto nilang magkaroon ng trabaho dito meron po silang option meron choice po sila,” pahayag ni Sec. Villanueva.

Bukas din ang oportunidad para sa mga babaeng welder sa Australia, Canada at maging sa mga kalapit-bansa sa Asya.

Magkikipagtulungan naman ang autodesk para sa software na gagamitin ng mga naka-enroll sa animation at short courses na ginagamitan ng AutoCAD.

Ayon kay Villanueva, nasa 12-libong estudyante ang unang makikinabang dito.

“Nandyan ang Walt Disney, ang Warner Bros. Mataas ang tingin nila sa ating animators sa mga games developers natin lalo na pagka ang ating mga estudyante ay nagkaroon ng access sa ganitong resources.”

Para sa karagdagang impormasyon, maaaring bumisita sa website ng TESDA na www.tesda.gov.ph o kaya’y tumawag sa # 887-7777. (Rey Pelayo & Ruth Navales, UNTV News)

Google Maps: Taiwan – Philippines

MANILA, Philippines — Kinansela na ng maraming Taiwanese travel agency ang tour packages sa Pilipinas.

Ito’y kasunod pa rin ng pagsiklab ng tensyon sa pagitan ng Taiwan at Pilipinas dahil sa pagkamatay ng isang Taiwanese fisherman bunsod ng umano’y pamamaril ng Philippine Coast Guard (PCG) sa Batanes.

Ayon sa Department of Tourism (DOT), nagpatupad ng patakaran ang Taiwanese government kung saan maaaring maparusahan ang mga travel agency na mag-aalok ng tour packages sa Pilipinas.

Halos sampung libong turista ang katumbas ng mga kanseladong group packages at kung magpapatuloy ito sa loob ng anim na buwan ay posibleng umabot sa 50-libong Taiwanese tourists ang mawawala sa Pilipinas.

Dahil naman sa pagbaba ng bilang ng turistang Taiwanese, naghahanap na ng alternative market ang DOT at kabilang dito ang China. (UNTV News)

Google Maps: Balintang Channel

 MANILA, Philippines – Inihayag ni Pangulong Benigno Aquino III na tapos na ang imbestigasyon ng National Bureau of Investigation (NBI) sa nangyaring pamamaril at pagkamatay ng Taiwanese fisherman sa Balintang Channel sa Batanes noong nakaraang linggo.

Sinabi ni Pangulong Aquino na kulang na lamang ang physical investigation sa sangkot na Taiwanese fishing vessel.

Sa ngayon ay hinihintay na lamang ang final report ng NBI bago ang susunod na hakbang.

Samantala, bukas umano si Pangulong Aquino na bumalangkas ng fisheries agreement sa Taiwan at iba pang karatig-bansa.

Ngunit nilinaw nito na mag-uumpisa lamang ang pag-uusap kapag naresolba na ang isyu sa napatay na Taiwanese fisherman.

Nagpasalamat naman ang Pangulo sa panawagan ng mga opisyal ng Taiwan na maging mahinahon at huwag nang idamay pa ang mga Pilipino doon.

“Ang balita natin naglabas ang prime minister ng Taiwan tsaka yung kanilang ministry of foreign minister na dapat hindi mamaltrato ang ating mga kababayan dun at nagkakaroon ng kaukulang parusa ang sinomang mapatunayan na magmamaltrato sa ating mga kababayan, nagpapasalamat tayo doon,” pahayag ni Pangulong Aquino. (Nel Maribojoc & Ruth Navales, UNTV News)

The 2013 Oklahoma City tornado as it passed through south Oklahoma City. (Ks0stm / Wikipedia)

Oklahoma City – Inilabas na ng mga opisyal ng Oklahoma ang kumpirmadong bilang ng mga nasawi sa pananalasa ng tornado.

Mula sa unang iniulat ng Oklahoma State Medical Examiner’s Office na mahigit limampung bangkay, ibinaba ito sa 24 kung saan 7 dito ay mga bata.

Paglilinaw ni Amy Elliott, ang Chief Administrative Officer for the Medical Examiner, posibleng nadoble ang bilang ng mga nasawi.

Sa kasalukuyan ay nasa dalawandaan na ang iniulat na nasugatan at animnapu sa mga ito ay mga bata.

Samantala, kasabay ng pananalasa ng tornado ay umulan rin ng yelo na kasing laki ng bola ng baseball sa Norman, Oklahoma.

Ayon sa ulat ng National Weather Service, naibaba ang tornado warning halos labing-anim na minuto bago ito rumagasa.

Tumagal ang naturang tornado ng halos 40-minuto na may lakas na 166 hanggang 200 miles per hour o katumbas ng 321 kilometers per hour.

Naapektuhan ng tornado ang ilang mga bahay, mga paaralan kabilang ang Plaza Towers Elementary School at Briarwood Elementary School, at ang Metropolitan City ng Oklahoma.

Dahil sa tindi ng pinsala, idineklara na ni US President Barack Obama na major disaster area ang Oklahoma.

Iniutos din nito ang federal aid bilang pandagdag tulong sa Oklahoma at sa recovery efforts na isinasagawa sa Moore na isa sa matinding timaan ng tornado.

Sa ngayon patuloy pa ang isinasagawang search at rescue operations lalo na sa mga eskwelahan na pinaniniwalaang may mga nadaganan pa ng debris.

Tiniyak naman ng Philippine consulate sa Chicago na walang Pilipino na nadamay sa pananalasa ng tornado sa Oklahoma at ibang lugar sa midwest ng Estados Unidos. (UNTV News)

FILE PHOTO: NAIA Terminal Arrival. Ayon sa Department of Tourism sa lahat ng mga foreign tourist na dumarating sa bansa ay pang lima ang mga Taiwanese sa may pinakamaraming bilang. (MARLON BRIOLA / Photoville International)

MANILA, Philippines – Tiniyak ng Department of Tourism (DOT) na magiging maayos ang pakikitungo ng mga Pilipino sa mga Taiwanese visitor sa bansa.

Ito ay sa kabila ng mga ulat na pangmamaltrato sa mga Pilipino sa Taiwan dahil sa pagkasawi ng isang mangingisdang Taiwanese sa Balintang Channel noong nakaraang Linggo.

Ayon kay Tourism Spokesman, Assistant Secretary Benito Bengzon, likas sa mga Pilipino ang pagiging magiliw sa mga bisita.

“Wala namang danger, wala namang panganib dahil Filipinos have always been very friendly, hospitable to all nationalities. So visitors from Taiwan should not worry about anything.”

Gayunman, hindi pa rin maiiwasan ang pangamba na maaaring bumaba ang Taiwanese arrivals sa bansa bunsod ng insidente.

Batay sa tala ng DOT, ang Taiwan ang pang-lima sa pinakamalaking tourism market ng Pilipinas.

Sa kabila nito, nakahanda naman ang pamahalaan na gumawa ng adjustment kung kinakailangan.

“It will have an effect on overall arrivals in the Philippines. Taiwan has always been an important source market for the Philippines but we are ready to adjust accordingly,” pahayag pa ni Bengzon. (Francis Rivera & Ruth Navales, UNTV News)

FILE PHOTO: COMELEC Chairman Sixto Brillantes Jr. (WILLIE SY / Photoville International)

MANILA, Philippines – Ipinahayag ni COMELEC Chairman Sixto Brillantes Jr. na maituturing na tagumpay ang katatapos lamang na 2013 midterm elections kumpara noong 2010.

Ito ang assessment ni Brillantes sa kabila ng mga kabi-kabilang batikos sa kredibilidad ng automated na botohan.

“Overall assessment compared to the 2010? I always categorized 2010 as success but qualified success. Ngayon tatanggalin ko na yung qualified, this is a success compared to 2010. Regardless of the other people are talking about, successful ang 2013.”

Ayon kay Brillantes, kung ikukumpara sa kauna-unahang nationwide computerized voting noong 2010, masasabing ang COMELEC ang nagpatakbo sa halalan ngayong 2013 at hindi ang Smartmatic.

Sinabi nito na sa mga susunod na halalan ay kakayanin na ng mga Pilipino ang paggamit ng PCOS machine kahit wala ang Smartmatic.

Gayunman, mas makabubuti na magpa-bid out ng panibagong system technology dahil sa dami ng batikos at aberya sa PCOS machine.

“2016 kaya na natin, if we will use PCOS again. But I’m not going to recommend PCOS anymore. Eh kung 2 eleksyon pa lang din a tumitigil ang ingay, e di palakas nang palakas ang ingay. Kawawa naman yung papalit sa akin.”

Sa kabila nito, nanindigan pa rin ang COMELEC na walang problema sa naging resulta ng katatapos na halalan.

“Those who just disagree, if they want to question the proclamation of the six, you better go up somewhere else. If they still want to create problem with senators, they can go anywhere if they want to question it,” pahayag pa ni Brillantes. (Pong Mercado & Ruth Navales, UNTV News)

FILE PHOTO: A Shell Gasoline Pump (ROEL CERDINA / Photoville International)

MANILA, Philippines – Nagpatupad ng dagdag sa presyo ng produktong petrolyo ang ilang kumpanya ng langis sa bansa ngayong Martes, Mayo 21.

Epektibo ala-6 ng umaga kanina, nagtaas ang Shell, Petron at PTT ng P0.35 sa presyo ng kada litro ng kanilang gasolina.

P0.25 naman ang itinaas sa presyo ng kada litro ng kanilang diesel.

Ang panibagong price adjustment ay bunsod umano ng paggalaw sa halaga ng langis sa pandaigdigang pamilihan. (UNTV News)

FILE PHOTO: Philippine National Police in formation (UNTV News)

MANILA, Philippines – Sampung libong pulis ang gagamitin ng National Capital Region Police Office (NCRPO) sa pagbubukas ng klase ngayong Hunyo.

Maging ang trapiko at seguridad ng mga mag-aaral ay gagawing prayoridad ng mga pulis sa NCR.

Sinabi ni NCRPO Chief Leonardo Espina na inatasan na niya ang lahat ng commander nito na makipag koordinasyon sa pamunuan ng mga paaralan na kanilang nasasakupan upang mailatag ang kaukulang seguridad.

Kasama sa pag-uusapan ay ang pagtatalaga ng mga pulis sa loob ng mga paaralan.

“Depende sa usapan, if kailangang pumasok pwede. Lahat ng kriminal aarestuhin,” ani Espina.

Maglalagay din ang PNP ng mga police assistance desk sa mga paaralan sa darating na pasukan.

“Lahat ng mga dadating na maraming estudyante sa eskwelahan, pinababantayan natin sa mga pulis. Lalo na yung galing sa probinsya na bago bago pa dito sa Maynila at hindi alam ang direksyon so maglalagay tayo desk at beat patrols dito sa Metro Manila,” pahayag ni PNP Chief Director General Alan Purisima.

Bukod sa kaligtasan ng mga estudyante, mahigpit ring babantayan ng mga pulis ang presyo ng school supplies.

“Bilihan ngayon ng school supplies, may suggested retail price na ang DTI, inspect natin para walang overpricing, walang magsasamantala,” pahayag pa ni Espina.

Kasabay nito, pinapayuhan rin ng NCRPO ang mga magaaral upang makaiwas sa mga masasamang loob.

“Don’t talk to strangers. If wala pa sundo, huwag munang lumabas ng paaralan,” pahayag pa ni Espina. (Victor Cosare & Ruth Navales, UNTV News)

FILE PHOTO: SCTEX. The Tipo Exit Toll Plaza in Hermosa, Bataan. (HANDTELL / Wikipedia)

MANILA, Philippines – Nagsumite na ng petisyon sa Toll Regulatory Board (TRB) ang pamunuan ng Subic-Clark-Tarlac- Expressway (SCTEX) para sa hirit na dagdag singil.

Nais ng operator nitong Bases Conversion and Development Authority (BCDA) na magpatupad ng higit 40-porsyentong increase sa kasalukuyang bayad sa toll.

Halos siyam na piso (P8.56/km) ang dagdag sa Class 1; pitong piso (P7.64/km) naman sa Class 2 habang P12.84/km sa Class 3.

Kung maaaprubahan ang petisyon, magiging P51 hanggang P388 na ang toll sa Class 1; P102 – P777 sa Class 2, habang aabot naman sa P153 – P1,165 ang babayarang toll sa Class 3.

Ayon sa SCTEX operator, kailangan na nilang magtaas ng singil upang mabayaran ang Japan International Cooperating Agency (JICA) na siyang nag-pondo sa halos 80-porsyento ng proyekto.

Ang SCTEX ay binuksan noong 2008 at huling nagpatupad ng toll hike noong 2011. (UNTV News)

Ang motorcycle driver na kinilalang si Joni Del Rosario habang ginagamot UNTV News and Rescue Team Cebu ang mga sugat at gasgas na natamo nito sa aksidente. (UNTV News)

MANDAUE CITY, Philippines – Nirespondehan ng UNTV News and Rescue Team ang isang motorcycle accident sa El Jayme St. Brgy Bakilid, Mandaue City, pasado alas-7 ng umaga nitong Lunes.

Nagtamo ng galos at gasgas sa kaliwang bahagi ng mukha, kaliwang siko, kamay at paa ang motorcycle driver na kinilalang si Joni Del Rosario, 31-anyos.

Ayon sa inisyal na imbestigasyon, tumaob ang motorsiklo ng biktima habang tinatahak ang flyover.

Matapos lapatan ng pangunang lunas ay agad dinala ng news and rescue team ang biktima sa Mandaue District Hospital. (Naomi Sorianosos & RBN, UNTV News)

FILE PHOTO: Ang tore ng PAGASA-DOST Weather Radar Station sa Barangay Punta, Aparri, Cagayan. (UNTV News)

MANILA, Philippines – Mahaharap sa mabigat na parusa ang sinumang maninira o magnanakaw ng equipment at accessories na ginagamit ng pamahalaan sa disaster monitoring.

Ito’y matapos na maisabatas ang Republic Act No.10344 o mas kilala bilang Risk Reduction Preparedness Equipment Protection Act.

Binuo ang nasabing batas matapos ang nangyaring pagnanakaw at paninira sa mga equipment ng mga ahensya ng pamahalaan, gaya na lamang ng ginawang pagnanakaw sa kable ng early warning device sa Agno River.

Dahil dito, hindi kaagad nabigyan ng babala ang mga residente sa pagtaas ng tubig sa ilog.

Maging ang safety device na nasa Bulkang Taal ay hindi rin pinaligtas ng mga magnanakaw.

“The recent victim was PHIVOLCS, yung kanilang solar panel sa taal nanakaw kaya nagtataka sila di gumagana yung isang sensor nila so ito ay mapoproteksyonan ng husto kasi nakakalungkot karamihan ng mga device na ito mga donasyon sa ‘tin pagkatapos di natin mapapangalagaan,” pahayag ni Agham partylist Representative Angelo Palmones.

Kabilang sa mga equipment  ay ang Weather Radar Surveillance System, Weather Monitoring System, Flood Monitoring Systems, Landslide Monitoring System, Tsunami Monitoring System, Earthquake Monitoring System at iba pa.

Ang sinumang  mapatutunayang nagnakaw ng government risk reduction equipment at accessories  ay papatawan ng 12 hanggang 15-taong pagkakabilanggo at pagmumultahin ng isa hanggang tatlong milyong piso.

Kasabay nito, nagbabala rin si Palmones na huwag basta-basta bibili ng bakal o tanso dahil baka ninakaw ito sa mga kagamitan ng DOST at PHIVOLCS.

“Lahat ng mga bumibili, magiingat ng mga risk reduction device ng PAGASA at PHIVOLCS, automatic yun pwede na silang hulihin, pwede silang ikulong without proving anti-fencing o kaya theft,” babala ni Palmones. (Grace Casin & Ruth Navales, UNTV News)

Pinangunahan ni DepEd Secretary Armin Luistro ang pagpapasimula ng taunang bayanihan na Brigada Eskwela. Kasama sa launching ay ang aktres na si Anne Curtis at ang mga representante ng AUSAID o Australian Government Overseas Aid Program nitong Lunes sa Philippine School for the Deaf. (NATALIE SARA VASQUEZ / Photoville International)

MANILA, Philippines – Pinasimulan na ng Department of Education (DepED) ang taunang Brigada Eskwela nitong Lunes,  May 20.

Sinabi ni Secretary Armin Luistro na ito na ang ika-sampung taon na paglulunsad ng programa.

Ito ang taunang paglilinis at paghahanda sa mga pampublikong paaralan sa buong bansa bago ang pagbubukas ng klase sa Hunyo.

“Ito yung unang araw ng Brigada Eskwela at kasama natin ang buong bayan sa lahat ng ating eskwelahan sa buong Pilipinas, naguumpisa na yung ating paghahanda yung ating maintennace work sa ating mga eskwelahan,” pahayag ng kalihim.

Kasabay nito, nanawagan ang DepED sa lahat ng mga magulang at estudyante na tumulong sa mga guro sa paglilinis ng mga silid aralan.

Ang dalawang linggong Brigada Eskwela ay naglalayong ibalik ang diwa ng bayanihan sa mga Pilipino kung saan tulong-tulong na inaaayos at nililinis ang mga silid aralan sa buong bansa.

Samantala, tiniyak rin ng DepED na handing-handa na din sila sa darating na pasukan.

Sinabi ni Sec. Luistro na ang mga kakulangan sa mga palikuran, silid aralan at iba pang imprastraktura ay inaasahang matatapos hanggang sa huling buwan ng taong ito. (Mon Jocson & Ruth Navales, UNTV News)

Kasama ng iba pang mga volunteers mula sa iba’t-ibang sektor ng lipunan ay ang mga kabataang ito na mula sa grupong Ang Dating Daan na nakibahagi sa Brigada Eskwela sa Dadiangas West Elementary School at General Santos City. (DARWIN DEE / Photoville International)

Maging ang puwersa ng Armed Forces of the Philippines at Philippine National Police ay taunang sumusuporta sa Brigada Eskwela. (MARVIN PONGOS / Photoville International)

]]> http://www.untvweb.com/news/brigada-eskwela-ng-deped-umarangkada-na/feed/ 0 http://www.untvweb.com/news/dilg-sec-roxas-pinuri-ang-pnp-sa-kontribusyon-nito-sa-pagdaraos-ng-mapayapang-2013-midterm-elections/ http://www.untvweb.com/news/dilg-sec-roxas-pinuri-ang-pnp-sa-kontribusyon-nito-sa-pagdaraos-ng-mapayapang-2013-midterm-elections/#comments Mon, 20 May 2013 12:29:44 +0000 UNTV Correspondents http://www.untvweb.com/news/?p=25414

FILE PHOTO: DILG Secretary Mar Roxas (UNTV News)

QUEZON CITY, Philippines – Kinilala ni Department of Interior and Local Government (DILG) Secretary Mar Roxas ang kontribusyon ng Philippine National Police (PNP) sa mapayapa at maayos na 2013 midterm elections.

Sa tulong ng PNP, malaki ang ibinaba ng bilang ng election related incident sa katatapos lamang na halalan sa bansa.

Ayon kay DILG Secretary Mar Roxas, malaki ang naitulong ng maagang paghahanda ng buong pwersa ng pambansang pulisya para sa seguridad ng eleksyon.

“Malinaw sa statistika na mas tahimik o mas orderly ang halalan 2013 kumpara noong nagdaang taon. ‘Di namin sinasabi na perfect ito, may mga insidente na hindi ka nais-nais, may mga namatay nga na PNP, gayunpaman mas bawas ang election related incidents sa taong ito kumpara sa nakaraang taon,” pahayag ni Roxas.

Batay sa record ng PNP, 81 election-related incidents lamang ang naitala  sa katatapos na 2013 midterm elections. Mas mababa ito kumpara sa 176 noong 2010 national elections at 227 noong 2007 midterm elections. (Ley Ann Lugod & Ruth Navales, UNTV News)

FILE PHOTO: Senator Franklin Drilon (UNTV News)

MANILA, Philippines – Hindi umano umaasa si Senador Franklin Drilon na mapupunta sa kanya ang senate presidency sa 16th Congress.

Ito ang kanyang naging reaksyon sa pahayag ng kapwa senador na si Miriam Santiago na posibleng ibigay sa kanya ang pinaka-mataas na posisyon sa senado bilang gantimpla sa tinamong tagumpay ng Liberal Party sa katatapos na halalan.

Sinabi ni Drilon na nagsilbing campaign manager ng partido na ang naturang posisyon ay pinagpapasyahan ng mga senador at hindi ng iisang grupo lamang. (UNTV News)

Department of Education Logo

MANILA, Philippines – Inapurubahan na ng Department of Education (DepED) ang tuition increase ng ilang pribadong paaralan sa elementarya at sekondarya sa Metro Manila ngayong school year 2013-2014.

Five to 10% tuition increase ang pinahintulutan ng kagawaran ngunit karamihan sa mga ito ay magtataas lamang ng anim na porsyento.

Isa sa isinaalang-alang ng DepED sa pagdedesisyon ng tuition increase ay ang budget ng paaralan kung saan malaking bahagi nito ay mapupunta sa salary increase ng mga guro.

Tiniyak naman ni Secretary Luistro na nagkaroon ng konsultasyon bago inaprubahan ang tuition increase. (UNTV News)

FILE PHOTO: Ang mga kabataan sa New Bataan sa Compostela Valley na ngayong Hunyo ay magsisipasok na sa kanikanilang mga klase. Ang New Bataan sa Compostela Valley ay isa sa mga pinamatinding nasalanta ng Bagyong Pablo noong Disyembre ng 2012. (PHOTOVILLE International)

MANILA, Philippines – Tuloy ang pagbubukas ng klase sa June 3 sa mga lugar na sinalanta ng Bagyong Pablo.

Ito ang tiniyak ng Department of Education (DepED).

Sinabi ni DepED Secretary Armin Luistro na sa mga itinayong tent muna pansamantalang magkaklase ang mga estudyante habang ginagawa ang mga gusali.

Samantala, naghahanap pa rin ang kagawaran ng mga lugar na pagtatayuan ng mga bagong eskwelahan. (UNTV News)