Eroplanong Sinasakyan ni DILG Secretary Robredo, Bumagsak; Robredo at 2 pa, Nawawala
FILE PHOTO: Department of Interior and Local Government Secretary Jesse Robredo (UNTV News)
MANILA, Philippines – Bumagsak ang sinasakyang eroplano ni DILG Secretary Jesse Robredo alas-4:30 ng hapon ng Sabado (Agosto 18) sa bahagi ng Masbate City. Si Robredo ay iniulat na kasalukuyang nawawala.
Ayon kay Philippine National Police chief, Director General Nicanor Bartolome, kasama ni Robredo ang isa niyang aide-de-camp na si Senior Inspector Jun Abrazado at dalawa pang piloto lulan ng Piper Ceneca PA 34-200 plane mula Cebu patungong Naga City.
Tinukoy ng PNP ang dalawang pilot na sina Captain Jessup Bahinting at ang Nepalese flight student na si Kshitiz Chand.
Ayon sa ulat, kagagaling lamang ni Robredo sa isang pagtitipon kasama si Under Secretary Rico Puno sa Cebu at umano ay hahabol sa awarding ceremony ng kanyang anak sa Naga City.
Tanging si Abrazado lamang ang nasaklolohan ng isang dumaraang mangingisda at ayon kay PNP Chief Bartolome, sinabi nitong ilang minuto pa lamang silang nakakaalis sa Cebu City nang magkaproblema ang eroplano. Sinubukan umano ng piloto na mag-emergency landing sa Masbate City Airport subalit nag-iba ang takbo nito.
“Di umabot sa runway yung plane nila. About 300 meters from the airport bumagsak sa tubig,” pahayag ni Bartolome.
Kinumpirma ni Bartolome na si Robredo at ang dalawang piloto ay nasa loob pa ng eroplano nang ito ay bumagsak. Sa kasalukuyan ayon kay Bartolome ay patuloy ang search and rescue operations sa lugar na tinukoy ni Abrazado kung saan bumagsak ang eroplano. Agad ring kumilos ang mga kawani ng Philippine Coast Guard at Philippine Navy upang tumulong sa paghahanap. (UNTV News)
