MANILA, Philippines — Naniniwala si Pangulong Benigno Aquino III na tama ang kanyang desisyong tanggalin sa pwesto si National Bureau of Investigation Director Magtanggol Gatdula.
Ayon kay Pangulong Aquino, dumaan sa due process ang imbestigasyon sa umano’y pagkidnap at pangingikil ng mga ahente ng NBI sa Haponesang si Noriyo Ohara bago ito tanggalin sa posisyon.
Paliwanag pa ng Pangulo, batay sa ginawa niyang review sa isinumiteng rekomendasyon ng Department of Justice Fact-finding Panel sa kaso, lumalabas na marami nang pagkakataon na nakarating kay Gatdula ang impormasyon sa umano’y kwetunableng pagkaka-detain kay Ohara ngunit wala umano itong ginawa.
“Well, the investigation is already completed. Ang punto dito dun sa imbestigasyon pong ginawa there was several occasions that he was informed by media either by Sec of Justice herself and others parang question of Ohara detained at NBI,” ani Pangulong Benigno Aquino III.
Hindi rin umano nito ipinatupad ang isang order mula sa justice department na nagsasabi na dapat ilipat na ang Haponesa sa Bureau of Immigration.
Wala namang nabanggit ang Pangulo kung may direktang kaugnayan si Gatdula sa di umano’y kidnapping at paghingi ng pera kay Ohara kaya niya ito tinanggal sa tungkulin.
Sa kasalukuyan ay may hawak ng listahan si Secretary de Lima sa mga posibleng pumalit sa mababakanteng posisyon ni Gatdula sa NBI. (Ito Ang Balita ni Nel Maribojoc, UNTV News)
