PASAY CITY, Philippines — Inilunsad ng UNTV sa pamamagitan ni Kuya Daniel Razon ang isa na namang panibagong kagamitan na makatutulong upang lalo pang mapagsilbihan at matulungan ang ating kapwa tao.
Kasabay ng opisyal na pagsasahimpapawid ng UNTV Radio La Verdad 1350kHz tapat at totoo sa serbisyo publiko, inilunsad din ang kaunaunahang mobile radio booth sa Pilipinas, ang UNTV Mobile Radio Booth nitong Lunes, January 16.
"Ito’y panibago nating bihikulo para magamit sa pamamahayag at ito’y kasabay ng UNTV at ito ang UNTV Radio, at kung nakikita niyo ito, ang ating UNTV Radio Mobile Booth at ito’y pwedeng iparada, dalhin...parang dala mo yung radio booth mo kahit saan ka magpunta at ito ang gagamitin natin sa iba’t-ibang coverage natin," ani Kuya Daniel Razon.
Ayon kay Kuya Daniel, kasabay ng pagnanais niyang maibalik ang glory days ng radyo, nais din naman niyang dalhin ang mga radio news anchor sa mismong mga pangyayari kung saan personal nila itong makikita upang magbigay ng komentaryo hinggil sa mga naturang isyu.
Sa pamamagitan rin nito, maaari ding makahingi ng tulong ang ating mga kababayan kung saan man sila datnan ng UNTV Radio Mobile Booth.
"Kung nakaparada ito sa isang lugar, puwede nilang, kung meron silang panawagan, pwede nila katukin yan at nandyan ang ating mga kasama pwede sila makapanawagan gamit ang ating radio mobile booth at magagamit natin ito sa ating public service," dagdag pa ng beteranong brodkaster.
Para naman kay Lito Bamba, ang taong nilapitan ni Kuya Daniel para magpagawa ng nasabing booth, bagama’t nahirapan siya sa nasabing proyekto, aminado naman siyang kakaiba sa lahat ang naging ideya ni Mr. Public Service.
"Pero ito yung ideya ni kuya, talagang kakaiba, well patunay na dumaan nga sa senado kanina, maraming nagulat na media, so i hope yung iba magsusunuran an din sa idea ni kuya at talagang makapag serbisyo din sa publiko ng tamang pagbabalita," ani Mr. Lito Bamba, presidente ng AdSpeak.
At gaya ng dati, ang lahat ng ito ay bilang patuloy pa ding pagtulong at pagdamay sa kapwa tao na syang matagal ng isinusulong ng UNTV.
"Ang pagpapatuloy ng ating public service, dun tayo naka-concentrate at mga karagdagan pang public service na ating isinasagawa. At yan ay tuluy-tuloy, sinusustinihan natin. And, of course, yung iba’t-ibang pamamaraan at iba pang public service na ating uumpisahan at yung mga dati pa na atin namang itutuloy," pahayag ni Mr. Public Service Kuya Daniel Razon. (Ito Ang Balita ni Mon Jocson, UNTV News)
