MANILA, Philippines — Inirekomenda na ng Department of Justice ang pagsasampa sa korte ng panibagong kaso laban kay dating Pangulo at ngayon ay Pampanga Congresswoman Gloria Macapagal-Arroyo.
Nakakita umano ng probable cause ang prosecution panel ng DOJ laban kay Ginang Arroyo upang kasuhan ito ng technical malversation kaugnay sa umano’y iligal na paggamit sa mahigit P530 million na pondo ng Overseas Workers Welfare Administration.
Bukod kay Ginang Arroyo ay pinakakasuhan din sina dating Foreign Affairs Secretary Alberto G. Romulo, dating OWWA Administrator Virgilio R. Angelo at dating Philhealth President Francisco T. Duque III.
Nag-ugat ang naturang kaso sa patung-patong na kasong katiwalian kabilang na ang plunder na isinampa sa DOJ ni Atty. Frank Chavez dahil sa umano’y sabwatan ng mga nabanggit na opisyal ng nagdaang administrasyon upang i-divert ang pondo ng OWWA at gamitin ito ng iligal.
Base sa records ng kaso, noong March 2003 ay inaprubahan ni Ginang Arroyo ang release ng 293,500 US Dollars pondo ng OWWA upang gamitin sa preparasyon ng bansa sa pagsuporta nito sa giyera sa Iraq.
Bago ito ay inaprubahan naman ni Ginang Arroyo ang pagta-transfer ng P530 million medicare fund ng OWWA sa Philhealth noong February 14, 2003.
Dinismiss naman ng DOJ ang reklamong plunder dahil sa umano’y wala itong sapat na basehan.
Samantala, sinusuportahan naman ng Malacañan ang naging desisyon ng DOJ kaugnay sa pagsasampa ng nasabing kaso.
‘Well, we support the decision of the DOJ, the panel of justice, in recommending the case of use of OWWA funds,” ani Sec. Edwin Lacierda, Presidential Spokesperson.
