MANILA, Philippines — Pagpatak ng alas-9 ng gabi ng Disyembre 31, 2011, nakakalat na sa iba't-ibang lugar sa Metro Manila ang buong pwersa ng UNTV News and Rescue Team, UNTV Fire Brigade, kasama ang iba pang mga rescue units upang umantabay sa mga maaksidente kasabay ng pagdiriwang ng bagong taon.
Naging abala ang grupo sa pagresponde sa ilang road accidents at mga naging biktima ng paputok mula alas-9pm ng Disyembre 31, 2011 hanggang alas-5pm ng January 01, 2012.
Kasama ring sumugod ang UNTV Fire Brigade sa 2 sunog sa Pasay at isa sa Kamuning, QC.
Subalit sa kabila ng engrandeng selebrasyon ng ilan may mga kababayan tayong kontento na sa panunuod sa mga fireworks display at hindi pa naghahapunan dahil sa kahirapan.
Ilan sa kanila ang napili ng UNTV at ng grupong Ang Dating Daan na bigyan ng kaunting regalo at mapasasalu-saluhan.
Isa sa naging receipient ng public service na ito ang 7 pamilyang magkakasamang nakatira sa gilid ng tulay sa Mindanao Avenue.
"Binigyan kami ng bahay sa Montalban, pangako sa amin bibigyan kami ng groceries, pero tatlong araw kaming gutom doon kaya balik kami dito kasi kapag nangangalakal kami, nakakakain kami," ani Aling Lenda Bakunawa na nakatira sa gilid ng tulay.
"Salamat sa Dios sa itinulong sa amin," pahayag naman ni Minda Mutas na nakatira rin sa gilid ng tulay.
Namigay din ng tulong ang ADD at UNTV sa iba pang kapuspalad nating kababayan sa iba pang areas ng Metro Manila.
Dinala naman ng UNTV News and Rescue Team ang lalaking ito sa Clinic ni Kuya matapos maputukan ng pla-pla ang kaniyang kamay.
Matapos magamot, binigyan din siya ng kaunting biyaya ng ADD at UNTV.
"Yung mga nabigyan ng tulong tingnan natin kung ano pa ang pwedeng maitulong sa kanila hindi yung basta konting dole out," ani Kuya Daniel Razon.
Asahan ng sa taong 2012 mas pinalakas na UNTV News and Rescue team ang maglilingkod sa ating mga kababayan at hindi tayo titigil sa pagtulong sa ating kapwa tao. (Ito Ang Balita ni Victor Cosare, UNTV News)
