CAGAYAN DE ORO, Philippines — Sa pagbisita ni Pangulong Benigno Aquino III umaga ng Martes sa Cagayan de Oro City kasama ang kanyang gabinete, ipinag-uutos nito na wala nang pababalikin at hindi na pahihintulutan ang mga residente na bumalik sa dating tinitirhan partikular sa Isla de Oro kung saan maraming bilang ng pamilya ang nasawi at mga bahay na inanod ng baha.
Ipinagbilin na rin ng Pangulo sa mga kagawad ng pulisya sa lungsod sa pangunguna ni PCSupt. Jufel Adriatico na bantayan ang nasabing lugar kung sakaling may magmamatigas at magpupumilit na bumalik sa nasabing lugar.
“We will relocate them to areas that are no longer dangerous to them, ensure necessary assistance,” anang Pangulo ng bansa.
Ayon kay DSWD Sec. Dinky Soliman, kinakailangang ma-identify agad ng lokal na pamahalaan ang mga lugar na posibleng paglipatan ng mga ito.
Ayon naman kay Mayor Vicente Emano, yan ang problema ng lungsod dahil wala na silang makitang lugar na maaaring gawing permanenteng relocation site na nasa mataas na dako.
Dahil dito sinabi ng alkalde na may posibilidad na babalik ang mga tao sa dating tinitirhan
“Kung meron man, private yun dito sa Lumbia, kaya may tendency na babalik yan sila dun. Kapit sa patalim na lang talaga,” ani Cagayan De Oro City Mayor Vicente Emano.
Samantala, nanindigan pa rin si Mayor Emano na walang malinaw na instruction ang PAGASA sa kanyang tanggapan hinggil sa bagyong Sendong na darating sa nasabing lungsod.
“Nobody informed us. Alam nyo ba kung pano ko nalaman? — Sa inyo, sa media, nabasa ko sa dyaryo na may bagyo. Humarap sa akin sino man sa PAGASA na they informed me in my office at magpapaputol ako ng leeg,” paninindigan ni Mayor Emano. (Ito Ang Balita ni Weng Fernandez, UNTV News)
