PARAÑAQUE CITY, Philippines — Sa isinagawang press conference nitong Lunes, napag-alaman mula sa ilang opisyal mula sa Civil Aviation Authority na malabo pang makahingi ng tulong pinansyal ang mga biktima ng plane crash noong Sabado sa loob ng Better Living Subdivision sa Parañaque City dahil sa hindi pa humaharap ang may-ari ng naturang eroplano.
Ayon sa natanggap na impormasyon ng Civil Aviation Authority, ang light air craft na Queen Air ay mine-maintain ng Aviation Technologies Innovations (ATI), pero ang totoo umanong may-ari ng Queen Air ay si Mr. Fidel Hembrador.
Hindi pa kilala ng CAAP ang naturang personalidad, pero ipapatawag nila ito sa lalong madaling panahon para pagpaliwanagin.
Sa ngayon, hawak na ng CAAP ang lahat ng mga flight records ng bumagsak na eroplano para maimbestigahan.
Nakakuha na rin ang ahensya ang aerial shots sa pinangyarihan ng insidente.
Ang makina naman ng eroplano ay nakatakdang suriin ng Olympic Airways para maimbestigahan ang kondisyon at para malaman kung ano talaga ang naging dahilan ng plane crash.
Sa inisyal na imbestigasyon ng CAAP, nasuri ang Queen Air at wala itong problema bago lumipad.
Hindi pa rin masabi ng CAAP kung human error o engine error ang nangyaring insidente.
Inamin naman ng executive director ng CAAP na si Retired General Ramon Guttierez na problema talaga ang mga residente na nakatira malapit sa runway ng paliparan.
Sa ngayon ay nasa 6 na kilometro aniya ang layo ng residential area, ngunit dapat ay may layo itong 20km.
Gugugol ng malaking halaga para mailipat ang mga residente malapit sa runway, at kailangan ng political will para maisagawa ito.
Samantala, maaaring abutin ng hanggang sa susunod na taon bago matapos ang imbestigasyon ng CAAP.
Nangako naman ang CAAP na agad na sasampahan ng kaso ang mga dapat managot sa insidente (Ito Ang Balita ni Naomi Sorianosos, UNTV News)
